خیرپور ناتھن شاہ (نامہ نگار) سیشن جج نے ڈسٹرکٹ جیل کے دورے کے دوران 2 قیدیوں کو رہا کرنے کا حکم دیدیا۔ تفصیلات کے مطابق سیشن جج دادو فہیم جان خان نے ڈسٹرکٹ بار ایسوسی ایشن کے عہدیداروں اور سول سوسائٹی کے ارکان کے ہمراہ ڈسٹرکٹ جیل کا دورہ کیا اور قیدیوں کے مسائل معلوم کئے اس موقع پر دو قیدیوں شوکت جمالی اور داؤد لوند نے شکایت کی کہ وہ 19 ہزار روپے جرمانہ ادا نہ کرنے کی وجہ سے قید کی سزا بھگت رہے ہیں اور وہ جرمانہ کی رقم ادا نہیں کر سکتے۔ اس موقع پر سول سوسائٹی کے ارکان نے قیدیوں کے جرمانے کی رقم ادا کر دی جس کے بعد سیشن جج نے دونوں قیدیوں کی رہائی کا حکم دیدیا۔
