راولپنڈی …پاک فوج کے ترجمان میجر جنرل اطہرعباس کے مطابق جنوبی وزیرستان میں گذشتہ رات سے شدت پسندوں کے خلاف پاک فوج کے آپریشن کا آغاز کر دیا گیا ہے ۔اس بات کا اعلان انہوں نے راول پنڈی میں میڈیا کو بریفنگ دیتے ہوئے کیا ۔ انہوں نے بتایا کہ جنوبی وزیرستان میں شدت پسندوں کیخلاف آپریشن کے آغاز کے بعد اس وقت مختلف مقامات پر لڑائی جاری ہے۔ عسکری ذرائع کے مطابق جنوبی وزیرستان میں ایک ہزار سے 15سو تک غیر ملکی جنگجو موجود ہیں۔حکومتی رٹ کے بحالی کے لئے ہونے والا یہ آپریشن شدت پسندوں کے تین ماہ کے محاصرہ کے بعد کیا جا رہا ہے۔ذرائع کے مطابق اس صورتحال میں شدت پسندوں کے خلاف آپریشن شروع کیا گیا جب ان کے پاس خوراک اور فیول کا بہت کم ذخیرہ ہے۔ ذرائع کے مطابق ان علاقوں میں موجود شدت پسندوں میں ازبک اور عرب جنگجوؤں کی بڑی تعداد موجود ہے ۔
