کراچی . . . کراچی کے علاقے لانڈھی میں پرانے کپڑوں کے گودام میں لگی آگ پر 19 گھنٹے بعدقابو پالیا گیا۔تاہم اس دوران بھاری مالیت کا کپڑا اور دیگر سامان جل کر خاک ہوگیا۔لانڈھی ایکسپورٹ پروسسینگ زون میں واقع پرانے کپڑوں کے گودام میں آگ کل دوپہر ویلڈنگ کے دوران نکلنے والی چنگاری کی وجہ سے لگی ۔ آگ کے شعلوں نے کچھ ہی دیر میں پوری عمارت کو اپنی لپیٹ میں لے لیا ۔ چیف فائر آفیسر احتشام الدین نے آگ کی شدت کو دیکھتے ہوئے اسے تیسرے درجے کی یعنی انتہائی شدید آگ قرار دے دیا۔شہر بھر سے فائر ٹینڈرز ،اسنارکل اور واٹر ٹینکرز طلب کرلئے گئے اور بالآخر فائر بریگیڈ کے عملے نے انیس گھنٹے کی جدوجہد کے بعد آج صبح آگ پر قابو پالیا ۔ تاہم اس دوران گودام میں موجود بھاری مالیت کا کپڑا اور دیگر سامان جل گیا جبکہ آگ کی شدت کی وجہ سے چھتیں اور دیواریں بھی گرگئیں۔خوش قسمتی سے کوئی جانی نقصان نہیں ہوا ۔فائر بریگیڈ حکام کے مطابق گودام کراچی ایکسپورٹ پروسیسنگ زون میں ہونے کے باوجود آگ بجھانے کا کوئی انتظام نہیں تھا،جس کی وجہ سے فائر بریگیڈ کے عملے کو شدید مشکلات کا سامنا کرنا پڑا۔
