گلگت . . . گلگت بلتستان میں قانون ساز اسمبلی کے انتخابات کیلئے انتخابی سرگرمیاں عروج پر پہنچ گئی ہیں۔جبکہ انتخابی مہم میں حصہ لینے والی تمام جماعتیں اپنے اپنے امیدواروں کو کامیاب کرانے کے لئے سرگرم نظر آتی ہیں۔12 نومبر کو ہونے والے انتخابات میں پاکستان پیپلز پارٹی، مسلم لیگ ن، مسلم لیگ ق اور متحدہ قومی موومنٹ سمیت متعدد مذہبی اور علاقائی جماعتیں حصہ لے رہی ہیں۔ سکردو شہر میں انتخابات میں حصہ لینے والی سیاسی جماعتوں اور آزادامیدواروں کی جانب سے انتخابی دفاتر کھول دیے گئے ہیں ۔ پاکستان پیپلز پارٹی نے علی آباد، عید گاہ کالونی اورحسن کالونی میں دفاتر کھولے ہیں۔متحدہ قومی موومنٹ کی جانب سے گلگت بلتستان الیکشن کے دوران سرگرمیاں اپنے عروج پر ہیں۔جبکہ انتخابی دفاتر بھی کھولے جاچکے ہیں۔ایم کیوایم کے قائد الطاف حسین نے گلگت بلتستان کے لوگوں سے اپیل کی ہے وہ انتخابات میں بڑھ چڑھ کر حصہ لیں۔۔گذشتہ روز مسلم لیگ ن کے قائد میاں نوازشریف ،وزیر اعلیٰ پنجاب شہباز شریف اور مسلم لیگ کے دیگر مرکزی رہنما ؤں نے پارٹی امیدواروں کی انتخابی مہم سے خطاب کیا اور عوام سے جمہوری عمل میں بڑھ چڑھ کر حصہ لینے کی اپیل کی۔ مسلم لیگ ق کے امیدوار اورڈپٹی سپیکر قانون ساز اسمبلی وزیر ولایت علی نے سکردو عیدہ گاہ میں اپنے دفتر کا افتتاح کیاجبکہ غذر میں گلگت بلتستان قانون ساز اسمبلی کے انتخابی جلسے سے خطاب میں پاکستان مسلم لیگ ق کی رکن اسمبلی ماروی میمن نے کہا کہ عوام ماضی کے حکمرانوں کے جھانسے میں نہیں آئیں گے اور ضمیر کے مطابق آزادانہ اپنے ووٹ کا حق استعمال کریں گے۔
